MUSICA M.I.D.I. MITI RACCONTI POPOLARI E VARIA ATTUALITA'

 - V'aviti a fiurari, cumpareddu,
ca all'ebbica prisenti, la scienza
è cunsistenti d'una cunsistenza
ca vi pitta 'ntra l'aria 'n aceddu.

  Chista di lu dutturi Ciriveddu,
vulènnula arrifrèttiri, 'n cuscenza,
vi pari cosa facili, ca senza
musturi vi fa stari bonu e beddu?

  Li jettichi pigghiaru un ternu 'n siccu;
e ora ca si fa lu sanatoriu
ognunu d'iddi già si senti riccu!

  Vui tistiati? Cca la cosa è seria;
abbasta a diri ca 'Gnazieddu Floriu
fici un spitali di la Ninfa Egeria.

  Unni ca si sviluppa un certu fetu,
ca pari fetu e fra di tantu è oduri...
e ccu 'ssa cura di 'stu prufissuri
lu malatu sta bonu e sta cuetu,

  Pirchì sappi truvari lu segretu
di dari lu pitittu e lu culuri,
e già ci su' rignanti e 'mperaturi
ca s'hannu scrittu dintra l'arfabetu.

  E 'ssa cosa si chiama 'nfurmativa,
ardica di furmicula, mi pari...
e 'na pirsuna morta torna viva.

  Ci sturiò pi menzu d'una lampa,
ed io lu sacciu, cumpareddu Turi
pirchì 'stu fattu ha jutu pri la stampa.

  -Sintiti, chi pigghiastivu 'a cinchina?
Faciti un discurseddu ca cunsola!
Ma 'un fussi megghiu ca pri stamatina
canciassivu sunata, mastru Cola?

  Nni facistivu già la testa china;
ma chi vi pari ca semu a la scola?
Allocu di spitali e miricina
parrati di pastizzi e di cannola!

  'Ssu prifissuri? Santu e binirittu,
li jettichi ci allonganu li jorna.
Froliu? Sia lodato unn'è ca passa!

  Ma a nui, ca nn'assicuta lu pitittu,
non nn'aviti a cuntari comu torna;
nn'avissivu a 'nsignari comu passa!

Significati delle parole in dialetto:
jettichi(etici, tisici)
fiurari (immaginare)
feto(puzzo)
cuetu(calmo)
pitittu(appetito)
arfabetu(s'intenda il registro di prenotazione del Sanatorio
'nfurmativa(formalina)
ardica di furmicula(letteralmente tradotto: ortica di formica, ma è la storpiatura di aldeide formica)
lampa(lampada, quella del vaporogeno)
ha jutu(è andato)