MUSICA M.I.D.I. MITI RACCONTI POPOLARI E VARIA ATTUALITA'

TESTO

I
E tenevo ‘na bbella putechella
ch'avevo fatto tanto p'accurzá...
Soglia 'e marmo, bancone, musticella:
nce asceva chellu ppoco pe campá!
Vene ‘o padrone ‘e casa,
dice: "'A mesata è ppoca!
mettitece 'a si-loca
e 'un ne parlammo cchiú!"
E aggiu lassato chella putechella,
speranno 'e ne truvà n'ata cchiú bbella!

Core, fatte curaggio,
'sta vita è nu passaggio:
Facimmoncillo chistu quatto 'e maggio...
che ce penzammo a ffà
si 'o munno accussí va?!

II
E tenevo ‘na bbella casarella
cu stanza 'e lietto e cammera 'e mangià...
’ Na cucina, ‘nu muorzo 'e luggetella...
nc'êvo fatto 'o grillaggio pe ll'està...
Arriva l'esattore
dice: "'A mesata è ppoca!
Mettimmoce 'a si-loca
e 'un ne parlammo cchiú..."
E aggio lassato chella casarella
speranno 'e ne truvá n'ata cchiú bbella!

Core fatte curaggio,
'sta vita è nu passaggio
facimmoce 'o siconno quatt''e maggio,
che nce penzammo a ffà
si 'o munno accussí va!?

III
E tenevo ‘na bbella 'nnammurata
ch'avevo fatto tanto p''a 'mparà...
Ma che saccio ched è, ll'ànno 'nciuciata:
nun è cchiú chella ch'era n'anno fa.
Primma, ‘na rosa semplice,
m''a faceva felice..
mo vo' 'e bbrillante e ddice
ca manco niente so'...
E i' lasso pur'a essa e bonasera!
e me ne trovo a n'ata cchiú sincera.

Core, fatte curaggio!
'sta vita è nu passaggio...
Facímmoce chist'atu quatt''e maggio...
Che ce penzammo a ffà,
si 'o munno accussí và!