MUSICA M.I.D.I. MITI RACCONTI POPOLARI E VARIA ATTUALITA'

(Musica di Eduardo Di Capua, versi di Ernesto Murolo; interpreti: Ciccillo Rondinella, Franco Ricci

Quanta vote nun 'o saccio,
cu n'amante sott' 'o vraccio,
pe' Pusilleco so' gghiuto
ll'aria fresca a respirà.
ll'aria fresca a respirà!...
Passa 'o trammo, e dint' 'o stritto,
- marciappiede beneditto!... -
Che velluto m' 'e venuto
sott' 'a mana, p' 'a scanzà!
Sott' 'a mana, p' 'a scanzà!
Che cenette a core a core!
Che fragranza! E che sapore
tene 'o vino si 'a guagliona
mette 'o musso primm' 'e te!
Ritornello:
Oi Pusilleco, Pusì...
sarrà ll'aria, sarrà che...
fosse 'a femmena cchiù tosta
'nbraccia all'ommo 'a fai cadè!...
Oi Pusilleco, Pusì!...

Tavulella apparicchiata
dint'a n'angolo, 'a spartata...
for' a loggia 'o risturante
sempe chino 'e giuventù!...
Sempe chino 'e giuventù!...
Aria 'e mare, che se mmesca
c' 'o profumo 'e ll'aria fresca,
e c'addore stuzzicante
d' 'o magnà che fa Munzù...
D' 'o magnà che fa Munzù...
E 'o tenore, mmiez' 'a stanza,
che ricama na rumanza...
D' 'o Vesuvio 'a luna sponta,
ride e corre... pè sentì...
Ritornello:
Oi Pusilleco, Pusì...ecc... ecc...

P' 'o ritorno 'na varchetta
mmiez' 'o mare ca t'aspetta...
Quanto tiempo aggiu penato
core mio, fatte vasà!
Core mio, fatte vasà!
Ombre 'e lume, rosse e chiare,
ca se mmìrano 'int' 'o mare...
Mare calmo ch' he 'mparato
tanta femmene a peccà!...
Tanta femmene a peccà!...
E ll'amante, ca p' 'e vene
ten' 'o ffuoco e te vo' bene,
se sturdisce, s'abbandona...
chello vuò... chello te dà...
Ritornello:
Oi Pusilleco, Pusì...ecc... ecc...

Sopra stampa tratta da "Usi e Costumi di Napoli e contorni descritti e dipinti", una riedizione pubblicata da Marotta editori, ma edita per la prima volta da Francesco de Bourcard nel 1857. Nella stampa sono raffigurati quattro ragazzini che con strumenti vari dovevano accompagnare una serenata.